Election 2018

8/20/2014

| |

இந்தியாவுக்கு கடத்தப்படவிருந்த ரூ.6 கோடி பெறுமதியான தங்கக் கட்டிகள்

கொழும்பில் இருந்து தலைமன்னார் ஊடாக கடல் மார்க்கமாக இந்தியாவிற்கு கடத்தப்படவிருந்த சுமார் 6 கோடி ரூபாய் பெறுமதியான தங்கக்கட்டிகளை தலைமன்னார் பொலிஸார் கைப்பற்றியுள்ளதோடு சந்தேக நபர்கள் 3 பேரையும் கைது செய்துள்ளதாக மன்னார் மாவட்ட பொலிஸ் அத்தியட்சகர் சரத்குமார ஜோசப் தெரிவித்தார்.

நேற்று திங்கட்கிழமை (18) நள்ளிரவு 12 மணியளவில் தலைமன்னார் கிராமப் பகுதியில் இருந்து கஞ்சா கடத்தும் நடவடிக்கைகள் முன்னெடுக்கப்பட்டு வருவதாக தலைமன்னார் பொலிஸாருக்கு புலனாய்வுத்துறையினர் தகவல் வழங்கினர்.

இந்நிலையில், தலைமன்னார் பொலிஸ் நிலைய உப பொலிஸ் பரிசோதகர் எஸ்.ஜெயரூபன் தலைமையிலான பொலிஸ் குழுவினர், தலைமன்னார் கிராம பகுதிக்கு சென்று தேடுதல்களையும் சோதனைகளையும் மேற்கொண்டனர்.

தலைமன்னார் கிராம கடற்கரை பகுதியில் சந்தேகத்திற்கிடமான கறுப்பு நிற ஹயஸ் வாகனம் ஒன்று நிண்டதை கண்ட பொலிஸார், குறித்த வாகனத்திற்கு அருகில் சென்று வாகனத்தில் இருந்த 3 பேரிடம் விசாரணைகளை மேற்கொண்டதோடு வாகனத்தையும் சோதனையிட்டனர்.

இதன்போது, வாகனத்தில் காணப்பட்ட ஆடைப் பைக்குள் 4 பகுதிகளாக பிரிக்கப்பட்டு தங்கக்கட்டிகள் வைக்கப்பட்டிருந்தது கண்டுபிடிக்கப்பட்டது. உருக்கப்பட்டு கட்டியாக்கப்பட்ட நிலையில் 56 தங்கத் துண்டுகள் அதில் காணப்பட்டுள்ளன.

கைப்பற்றப்பட்ட தங்கத்துண்டுகள் 11 கிலோ 828 கிராம் நிறை கொண்டது என தலைமன்னார் பொலிஸார் தெரிவித்தனர். இதன் பெறுமதி சுமார் 6 கோடி ரூபாய் என பொலிஸார் தெரிவித்தனர்.

குறித்த 3 பேரும் கைது செய்யப்பட்டு தலைமன்னார் பொலிஸ் நிலையத்திற்கு கொண்டு செல்லப்பட்டு விசாரணைகளை மேற்கொண்ட போது, குறித்த தங்கக்கட்டிகள் தலைமன்னார் கடல் வழியாக இந்தியாவிற்கு கொண்டு செல்வதற்காக வைக்கப்பட்டது என தெரியவந்ததாக பொலிஸார் தெரிவித்தனர்.

கைதான மூவரும், கொழும்பு மற்றும் புத்தளம் பகுதிகளைச் சேர்ந்தவர்கள் எனவும் அவர்களிடம் இருந்து 6 கையடக்கத் தொலைபேசிகள் மீட்கப்பட்டதோடு அவர்கள் பயணம் செய்த வாகனமும் கைப்பற்றப்பட்டதாக தெரிவித்த தலைமன்னார் பொலிஸ் நிலைய தலைமையக பதில் பொறுப்பதிகாரி ஏ.வி.எஸ்.சம்பிக்க, குறித்த நபர்களிடம் முழுமையான வாக்குமூலம் பெற்றுக்கொள்ளப்பட்டதன் பின் மன்னார் நீதிமன்றத்தில் ஆஜர் படுத்தப்படுவார்கள் என கூறினார்.