Election 2018

1/18/2018

திறந்த கடிதம்


திரு கஜேந்திரகுமார் பொன்னம்பலம் L’image contient peut-être : 1 personne
தலைவர்
அகில இலங்கை தமிழ் காங்கிரஸ்
தமிழ்தேசிய விடுதலை முன்னணி
தமிழ் தேசிய பேரவை
மதிப்புக்குரிய கஜேந்திரகுமார் அவர்களுக்கு வணக்கம்.
உங்களது அரசியல் வளர்ச்சிக்கு குந்தகம் விளைவிக்கும் செயல் ஒன்று கடந்த மூன்று நாட்களாக உங்களது கட்சி ஆதரவாளர்கள் பெரும்பான்மையோரால் முகநூலில் தொடர்சியாக வந்து கொண்டிருப்பதை உங்கள் கவனத்துக்கு கொண்டு வரவிரும்புகின்றேன்.
தமிழ்தேசியகூட்டமைப்பின் பேச்சாளர், யாழ்மாவட்ட பாராளுமன்ற உறுப்பினர் M .A .Sumanthiran அவர்களும் , அவரது மகளும் இருக்கும் படம் ஒன்று முகநூலில் பகிரப்பட்டு, அனாகரிகமான வார்தை பிரயோகங்களுடன் பதிவும், பின்னூட்டங்களும் இடப்பட்டு வருகின்றது. சுமந்திரன் அரசியல்வாதி பொதுவெளியில் நிற்பவர் அவர் தொடர்பான விமர்சனங்கள் அனாகரிகமானதாக இருந்தால் கூட புரிந்து கொள்ள கூடியதே. ஆனால் அவரது மகள் என்ற காரணத்துக்காக, அரசியலில் எவ்வகையிலும் சம்பந்தப்படாத அவரது மகளின் படத்தையும் பகிர்ந்து கொச்சைபடுத்தும் பதிவுகளும் பின்னூட்டம் இடுவதும், நாகரீகமான சமூகத்தின் செயலாக இருக்க முடியாது.
சிலமாதங்களுக்கு முன்பு , சுமந்திரன் அவர்கள், அவரது மனைவியை பின்னிருந்து கட்டித்தழுவுவது போன்ற உல்டா படம் ஒன்றை வெளியிட்டு சிங்கள அழகியுடன் சுமந்திரன் என்ற ஓர் பதிவு வந்தது. அப்போதே என்னை போன்ற பலர் அதனை கண்டித்தனர்.
தற்போது மீண்டும் அவரும் அவரது மகள் இருக்கும் படத்தையும் பகிர்ந்து கொச்சைபடுத்தும் பதிவுகள் அனாகரிகமான சொல்லாடல்களுடன் கடந்த மூன்று நாட்களாக வெளிவந்து கொண்டிருக்கின்றது. அவரது மகளது படத்தை பொதுவெளிக்கு கொண்டுவந்து
பகிர்வதற்கு எந்த கொம்பனுக்கும் உரிமையில்லை. இதனை செய்பவர்களில் பெரும்பான்மையோர் உங்களது ஆதரவாளர்களே.
சுமந்திரன்னும், அவரது சரணாகதி அரசியலும் சுத்துமாத்துக்களும் தமிழ்மக்களுக்கு நன்மை விளைவிக்காது என்பதும் அவர்
தமிழர் அரசியலில் இருந்து ஜனநாயக ரீதியில் அப்புறப்படுத்தப்பட வேண்டும் என்பதில் எனக்கு மாற்றுக் கருத்து இல்லை. ஆனால் அரசியலுக்கு சம்பந்தமில்லாத
அவரது குடும்ப உறுப்பினர்களை இழுத்து, அவர்களின் படங்களை போட்டு எதிர்பு அரசியல் பிரச்சாரம் செய்வது அறமற்றதாகும். இதுவல்ல தமிழர் பண்பாடு, இதுவல்ல தமிழ்தேசியம். அரசியலுக்கு அப்பாற்பட்ட சாதாரண பொதுமக்கள், இந்த அறமற்ற அரசியல் பிரச்சாரத்தால் அருவருப்பு அடைகிறார்கள். இது நிட்சயம் உள்ளூராட்சி சபை தேர்தல்களில் உங்களது கட்சியின் வெற்றி வாய்ப்பை பாதிக்கும் என அச்சப்படுகின்றேன்.
எனவே தயவு செய்து உங்களது கட்சி உறுப்பினர்கள், ஆதரவாளர்கள் அனைவருக்கும், மேற்கொண்டு, சுமந்திரனின் மகள் தொடர்பான படத்தை போட்டு பதிவுகள் இடவேண்டாம் என்றும், ஏற்கனவே இடப்பட்ட பதிவுகளை அழிக்குமாறும் நீங்கள் அறிவிக்க வேண்டும் என தாழ்மையுடன் கேட்டுக் கொள்கின்றேன். உங்களது கட்சி உறுப்பினர்களையும், ஆதரவாளர்களையும் கட்டுப்பாட்டுக்குள் கொண்டு வந்து சரியான திசைவழியில் அவர்களை வழிநடாத்த வேண்டிய பொறுப்பு தலைவர் என்ற வகையில் உங்களுக்கு உண்டு என்பதையும் சுட்டிக்காட்ட விரும்புகின்றேன்.
ஈழத்தமிழர் அரசியல் பரப்பில் உங்களதும், உங்கள் கட்சி மற்றும் கூட்டணியினதும் வகிபாகத்தை உறுதிப்படுத்தி கொள்ள, எதிர்வரும் உள்ளூராட்சி தேர்தல்களில் வெற்றி பெற வாழ்த்தி விடை பெறுகிறேன்
இப்படிக்கு
யோகா வளவன் தியா
அன்பே சிவம்
அறிவே பலம்
18.01.2018

0 commentaires :

Post a Comment